Астанада Asian Awards 2025 марапаттау салтанаты өтті
2025 жылғы 13 тамызда Астанада Азия Паралимпиадалық комитетінің (АПК) Конференциясы мен 8-ші Бас Ассамблеясы аясында Asian Awards 2025 марапаттау салтанаты өтті, деп хабарлайды Sport+.
Asian Awards — паралимпиадалық спорттағы үздік жетістіктерді мойындау үшін АПК тағайындаған беделді сыйлық. Марапат спортшыларға, жаттықтырушыларға, ұлттық комитеттерге, ресми тұлғаларға, командаларға және БАҚ өкілдеріне Азиядағы паралимпиадалық қозғалысты дамытуға қосқан елеулі үлесі үшін табысталады.
Биыл бұл салтанат алғаш рет Орталық Азияда өтті. Марапаттау рәсімін өткізу құқығы инклюзия мен тең мүмкіндіктер құндылықтарын ілгерілетіп, паралимпиадалық қозғалысты белсенді дамытып келе жатқан Қазақстанға берілді.
Марапаттар жеті негізгі номинация бойынша табысталды:
Үздік жас спортшы (Best Youth Athlete) — Шэнгао Хэ (Қытай, паражүзу). Марапатты Chery International вице-президенті Чжу Шаодун табыс етті.
Үздік спортшы қыз (Best Female Athlete) — Юэн Кей Хо (Гонконг, бочча). Марапатты AYPG Dubai 2025 төрағасы, мәртебелі Тани Джума Беррегад табыс етті.
Үздік спортшы ер (Best Male Athlete) — Абделькарим Хаттаб (Иордания, пауэрлифтинг). Марапатты АПК вице-президенті және Сауд Арабиясының паралимпиадалық жеңіл атлетика федерациясының басшысы Абдульрахим Әлшейх табыс етті.
Үздік команда (Best Team Performance) — Жапонияның арбамен регби ұлттық құрамасы (марапатты вице-капитан Масаюки Хага қабылдады). Марапатты АПК вице-президенті және AINAGOC бас хатшысының орынбасары Кадзухиро Яги табыс етті.
Үздік спорттық фотосурет (Best Photography) — Ынжон (Оңтүстік Корея). Марапатты АПК вице-президенті және Оңтүстік Корея Паралимпиадалық комитетінің вице-президенті Джай-Джун Чоун табыс етті.
Азияның үздік спорт функционері (Exemplary Asian Official) — Захра Немати (Иран, паражебе ату). Марапатты UK Sport төрағасы, Халықаралық Паралимпиадалық комитет вице-президенті қызметіне кандидат, басқарма мүшесі профессор Ник Уэбборн табыс етті.
Үздік ұлттық паралимпиадалық комитет (Outstanding NPC Performance) — Оңтүстік Кореяның Ұлттық паралимпиадалық комитеті. Марапатты Қазақстан Республикасының Туризм және спорт министрі Ербол Мырзабосынов табыс етті.
Сондай-ақ салтанат аясында паралимпиадалық спортты дамытуға қосқан ерен еңбегі үшін Asian Order құрметті марапаттары табысталды:
Масаюки Мизуно (Жапония) — марапатты JPC атқарушы директоры Масаки Фудзивара қабылдады.
Бэ Дон Хён (Оңтүстік Корея).
Сауд Арабиясы ханзадасы Фахад бин Джалауи Әлсауд.
Қазақстан Республикасының Ұлттық Паралимпиадалық комитетінің президенті Қайрат Боранбаев атап өтті:
«Asian Awards салтанатының Астанада өтуі — Қазақстанның инклюзивті спортты дамытудағы үлесін мойындау және еліміздің теңдік пен қолжетімділік құндылықтарын ілгерілетуде көшбасшы болуға дайын екенінің дәлелі. Біз Азия паралимпиадалық қозғалысының ең үздік өкілдерін елімізде қабылдап, олардың жетістіктерін атап өткенімізге мақтанамыз».
Іс-шара ұйымдастырушылары — Қазақстанның Ұлттық Паралимпиадалық комитеті мен Азиаттық Паралимпиадалық комитет, Қазақстан Республикасының Туризм және спорт министрлігі және халықаралық серіктестердің қолдауымен.
