Валерий Симонов: Мақсат – кубокты Астанаға алып кету

Астана баскетбол командасының шабуылшысы Валерий Симонов «Champion» клубына қарсы өткен матчта елордалық команданың ең нәтижелі ойыншысы атанып, Sport+ сайтына берген сұхбатында ойын қорытындысын жасап, кубоктық матчтардағы мақсатымен бөлісті.

«Бүгін біздің қарсыласымыз — Алматының «Champion» клубы болды. Олар — жас жігіттер, барынша тырысып, соңына дейін күресті. Бұған дейін олар Қазақстанның Ұлттық лигасы мен Кубогында ойнамаған, сондықтан бұл турнир — олар үшін үлкен тәжірибе мен ойын практикасы.

Біз үшін ойын сәтті өтті: матч қорғаныс пен шабуылдағы өз принциптерімізді тағы бір рет пысықтап, өзара түсіністікті арттыруға мүмкіндік берді. Алда бізді қиын кездесулер күтіп тұр, сол себепті оларға толық дайын болуымыз қажет.

Біздің турнирдегі мақсат — біреу ғана: жеңіске жетіп, кубокты Астанаға алып қайту. Біз Алматыда екі апталық жиын өткізіп, жолдастық кездесулерде ойнадық. Енді тек осы сапардың басты мақсатын орындау ғана қалды», — деді Валерий Симонов.