Әлібидің Ідіріс TUF финалында неге жеңілді? Сағындық Мекеев үш негізгі себепті атады

ММА және панкратион федерациясының президенті, Қазақстан Республикасының еңбек сіңірген жаттықтырушысы, Қазақстандағы ММА дамуына үлес қосқан Сағындық Мекеев Sport+ арнасына берген сұхбатында Әлібидің Ідірістің TUF финалындағы жеңілісінің себептерін талдап берді.

«Менің ойымша, ең бірінші себеп — Әліби психологиялық тұрғыдан дайын болмады. Оған өте көп қысым түсті, үлкен назар аударылды, барлығы „ол TUF-ты жеңіп, Қазақстаннан шыққан алғашқы чемпион“ болады деп жазды. Көпшілік, менің өзім де, оның жеңісіне сендім, UFC-мен бірден келісімшартқа отырады деп ойладық. Енді бұл сұрақ ашық күйде тұр — түседі ме, жоқ па, белгісіз. Біз бәріміз TUF-тағы жекпе-жектерін көрдік, оны UFC-де көргіміз келеді. Жеңіліске үш себеп бар. Біріншісі — жоғарыда айтқанымдай, психологиялық қысым. Одан көп нәрсе күтілді, бұл оның жағдайына әсер еткен болуы мүмкін. Бұл — басты себептердің бірі, яғни жекпе-жекке психологиялық дайындық. Екінші себеп — салмақ қуу. Әдетте бұл жағынан оның еш қиындықтары болмаған, бірақ бұл жолы біз оны өлшеуге келгенде ширманың артында тұрғанын көрдік. Бұл да бір белгі. Үшінші себеп — қарсыласы. Ол жай ғана мықтырақ болған шығар. Қалғанының бәрі — осы үш себепке қосымша ғана. Меніңше, Әлібидің жағдайында бірінші себеп негізгі рөл ойнады».

Сағындық Мекеевтің толық сұхбатын төменнен көре аласыз.