Айдар Махметов Кабардиев – Ашурлаев жекпе-жегі туралы: Шоу көрсете алатын екі лайықты қарсылас

ММА сарапшысы, БЖЖ бойынша қара белбеу иегері, «Жеңіс» дзюдо клубының спорттық директоры Айдар Махметов Алматыда өтетін NAIZA 82 турнирінің ко-мейн ивенті саналатын Магомед Кабардиев пен Наби Ашурлаев арасындағы жекпе-жекке қатысты Sport+ сайтына пікірін білдірді.

«Наби Ашурлаев — Магомед үшін өте қауіпті қарсылас. Себебі ол өте ұзақ уақыттан бері жекпе-жекке шығып жүр. Әуесқой деңгейдегі кездесулерді есептесек, оның мансабы шамамен 12–13 жылға созылып келеді. Ол 2014 жылы-ақ Ресей ММА одағының әуесқой турнирінде өнер көрсеткен. Әуесқой ММА бойынша екі дүркін Еуропа чемпионы — бұл өте маңызды жетістіктер.

Бұдан бөлек, Ресей чемпионатының жүлдегері әрі чемпионы атанған, сондай-ақ Еуразиядағы негізгі промоушендердің көбінде жұдырықтасқан. Оның мансабында бар болғаны бір ғана жеңіліс бар, ол көп жыл бұрын болған. Қателеспесем, ол жекпе-жек Глеб Хабибуллинге қарсы өткен және төрешілер шешімімен жеңілген.

Көпшілік Ашурлаев негізінен партерде күреседі деп ойлайды, бірақ оның аяқта тұрып жұдырықтасу деңгейі де жаман емес. Ол Дагестан чемпионаттарында ушу-саньда бойынша өнер көрсетеді, онда жекпе-жектердің басым бөлігі тік тұрып өтеді, партер іс жүзінде болмайды. Соған қарамастан, оның партердегі дайындығы да жоғары. Ауырту және тұншықтыру әдістерін жақсы меңгерген.

Магомед Кабардиевке келсек, ол ұзақ уақыт бойы өте перспективалы файтер ретінде қарастырылды. Бір кезеңде, шамамен екі-үш жыл бұрын, оның UFC-ке өтуге мүмкіндігі жоғары болды. Өкінішке қарай, «Наше дело» жобасындағы Грозинге қарсы және «Хардкордағы» Гаджиевке қарсы жеңілістері оның қарқынды дамып келе жатқан мансабын баяулатып, қайта бастауға мәжбүр етті.

Қазір оның Naiza ұйымында соңғы жеңісі бар. Ол айқын соққыға негізделген файтер, шыққан тегіне қарамастан. Дагестанда туғанымен, бала кезінен Қазақстанға көшіп келіп, дәл осы жерде қалыптасқан. Ол көбіне стойкада жұдырықтасқанды ұнатады. Күрес дайындығы бар, бірақ көбіне қорғанып, жекпе-жекті қайтадан стойкаға ауыстыруға тырысады.

Оның бойы Ашурлаевқа қарағанда әлдеқайда ұзын, әрі жеңіл салмақта ірі спортшы саналады. Ал Ашурлаев бұрын негізінен 66 келі салмақ дәрежесінде өнер көрсеткен. Кабардиев осы физикалық артықшылықтарын пайдаланып, қашықтықты сақтап, қарсыласына жақындауға мүмкіндік бермеуі керек. Егер бұл жоспарын жүзеге асырса, жеңіске жетуге мүмкіндігі жоғары.

Дегенмен, Ашурлаев — өте қауіпті қарсылас және ол жеңіске жетудің жолдарын табуға тырысады. Ол да тек жеңіске бағытталған және үнемі жеңіске жетіп үйренген.

Бұл жекпе-жекте мүмкіндіктерді 50-ге 50 деп бағалаймын. Себебі бұл — айқасып қана қоймай, шоу көрсете алатын екі мықты қарсылас. Менің ойымша, бұл кездесу жарқын өтіп, тіпті кештің үздік жекпе-жегі болуы мүмкін».

Турнир 2 мамыр күні өтеді. Тікелей трансляция Sport+ телеарнасында көрсетіледі.