Топтағы бірінші орын үшін тартыс: «Қайрат» — «Андерлехт» матчының тікелей эфирі

«Қайрат» футзалдан УЕФА Чемпиондар лигасының келесі кезеңіне шығуды мерзімінен бұрын қамтамасыз етті. Себебі Бельгияда өтіп жатқан екінші топтың ойындарына румыниялық «Юнайтед Галац» командасы келмеді. Осыған байланысты оның барлық қарсыласына 5:0 есебімен техникалық жеңіс берілді.

Осылайша, турнирдің алғашқы күнінде-ақ топтағы қалған үш команданың Чемпиондар лигасының келесі кезеңіне жолдама алғаны белгілі болды. Енді тек олардың топтағы орындарын анықтау қалды.

Алаң иесі «Андерлехт» пен алматылық «Қайрат» Латвияның «Бейтар» командасын тиісінше 6:0 және 5:3 есебімен жеңді.

Енді қос команда өзара кездесуде топ жеңімпазын анықтайды.

«Андерлехт» — «Қайрат» матчы 31 қазаннан 1 қарашаға қараған түні, Астана уақытымен сағат 00:30–да басталады.

Кездесуді Sport+ Qazaqstan телеарнасынан, сондай-ақ sportplustv.kz сайтынан тікелей эфирде тамашалауға болады.