Шавкат Рахмонов қашан оралады? Базров жарақат пен жасалған ота жайлы мәлімдеді

Қазақстандық аралас жекпе-жек (ММА) жауынгері Шавкат Рахмоновтың бапкері Эдуард Базров шәкіртінің жарақатына қатысты егжей-тегжейлі ақпаратпен бөлісті, деп хабарлайды Sport+.

Базровтың айтуынша, Германияда жасалған операция сәтті өткен.

«Жекпе-жекті түсінетін, Шавкат Рахмоновтың кім екенін білетіндер оның жағдайына алаңдап отыр. Бұл — ескі, өте ескі жарақат, оған бұл ота жас кезінде де жасалған, уақыт өте келе қайта қажет болды. Аяғының мәселесі бар, сондықтан қалпына келу процесі ұзаққа созылды. Қазір айта алмайтын қиындықтар болды. Біз қозғамайтын тақырыптар бар, бірақ жалпы Германияда ота жасалып, бәрі сәтті өтті. Айқас байламдарының ұзақ уақыт жазылатыны белгілі, толық әрі терең оңалту курсынан өту керек. Әзірге осыны ғана айта аламын. Жаттығуға тек толық реабилитациядан кейін ғана оралуға болады, бұл кемінде жарты жыл», — деді Базров.