Юлия Путинцева Азия ойындарының жекелей сынында қола жүлдеге ие болды

Әйелдер арасындағы жекелей сында Қазақстанның екінші ракеткасы Юлия Путинцева Жапонияның Айти префектурасы мен Нагоя қаласында өтіп жатқан XX жазғы Азия ойындарының қола жүлдесін иеленді.

Жекелей сынның жартылай финалында қазақстандық теннисші Қытай өкілі Чжан Шуаймен кездесті. 1 сағат 23 минутқа созылған матч қытайлық спортшының 6:4, 6:2 есебіндегі жеңісімен аяқталды.

Бірінші партияда қарсыластар тең дәрежеде өнер көрсетті. Алайда сет соңында Чжан Шуай басымдыққа ие болып, 6:4 есебімен жеңіске жетті. Екінші партияда Қытай өкілі қарқынын үдетіп, 6:2 есебімен басым түсті.

Осылайша, Юлия Путинцева Азия ойындарының жекелей сынын қола жүлдемен аяқтады.

Жартылай финалға дейін Қазақстан өкілі турнирдің алдыңғы кезеңдерінен сенімді өтті. Ширек финалда Путинцева Таиланд теннисшісі Мананчаю Савангкаевты 6:3, 6:0 есебімен жеңіп, Азия ойындарының жүлдесін алдын ала қамтамасыз еткен болатын.

Сонымен қатар Юлия Путинцеваның Азия ойындарындағы өнері жалғасуда. Ол Анна Данилинамен бірге әйелдер арасындағы жұптық сында да Қазақстан намысын қорғап жатыр. Қазақстандық дуэтті ширек финалдық кездесу күтіп тұр. Жеңіске жеткен жағдайда Данилина мен Путинцева жартылай финалға шығып, Қазақстанға теннис бәсекесіндегі тағы бір жүлдені қамтамасыз етеді.