«Ертіс» Қазақстан құрамасының бұрынғы футболшысын қатарға қосты

Павлодарлық «Ертіс» 28 жастағы қазақстандық жартылай қорғаушы Владислав Васильевпен келісімшартқа қол қойғанын жариялады, деп хабарлайды Sport+.

28 жастағы жартылай қорғаушы — «Шахтер» футбол клубының түлегі, дәл осы командада кәсіби мансабын бастаған. Қазақстанның әр аймағынан келген 26 жас ойыншымен бірге бразилиялық «Оле Бразил» академиясында тәлім алған. Туған клубы «Шахтер» сапында Премьер-лигада 17 жасында дебют жасап, Қазақстан чемпионатында жалпы 59 матч өткізіп, 3 гол соқты.

Қостанайлық «Тобол» сапында 2022 жылғы Қазақстан Суперкубогының иегері атанса, 2023 жылы шымкенттік «Ордабасы» құрамында ел чемпионы болды.

Васильевтің шетелдік тәжірибесі де бар: Өзбекстан чемпионатында «Андижан» командасының намысын қорғады. Алайда, мансабының басым бөлігін Беларусь елінде өткізді. Оның еншісінде Беларусь чемпионатында 93 матч пен 15 гол бар. Ол «Энергетик-БГУ», «Рух Брест», «Динамо Минск», «Минск» және «Динамо Брест» сияқты Жоғарғы лига клубтарында ойнады. 2019 жылы «Динамо-Брест» құрамында Беларусь чемпионы атанды. Дәл осы клубтан ол павлодарлық «Ертіске» ауысты.

Владислав Васильев Қазақстан ұлттық құрамасы сапында 12 матч өткізген.