Дмитрий Баландин Қазақстанның Су спорт түрлері федерациясының бас хатшысы болып тағайындалды
Қазақстанның Ұлттық Олимпиада комитетіне сілтеме жасай отырып, Қазақстанның Су спорт түрлері федерациясының кезектен тыс конференциясы барысында жүзуден Олимпиада чемпионы Дмитрий Баландин федерацияның бас хатшысы болып тағайындалды, деп хабарлайды Sport+.
Сергей Дроздовтың өкілеттігін мерзімінен бұрын тоқтату туралы мәлімдемесінен кейін Конференция қатысушылары Баландиннің кандидатурасын бірауыздан қолдады.
«Дмитрий Баландиннің тағайындалуы — оның спорттағы зор жетістіктерін мойындау ғана емес, сонымен қатар Федерацияны жаңарту мен институционалдық тұрғыда нығайту жолындағы маңызды қадам. Біз оның кәсібилігі мен беделі елдегі су спорты саласының дамуына үлкен үлес қосатынына сенімдіміз», — деді Федерация президенті Нұрлан Жақыпов.
Дмитрий Баландин — Қазақстан Республикасының еңбек сіңірген спорт шебері, 2016 жылғы Олимпиада чемпионы, Азия ойындары мен халықаралық турнирлердің бірнеше дүркін жеңімпазы. 2021 жылдан бастап Қазақстанның ұлттық жүзу құрамасында жаттықтырушы және кеңесші ретінде белсенді жұмыс істеп келеді.
